Փորձաքննությունների ազգային բյուրոյի բաժնի պետը ձերբակալվել է կաշառք ստանալու կասկածանքով

Մայիս 20-ին ձերբակալվել է ՀՀ գիտությունների ազգային ակադեմիայի «Փորձաքննությունների ազգային բյուրո» ՊՈԱԿ-ի Ճանապարհատրանսպորտային պատահարների հանգամանքների տրանսպորտային հետքաբանական և տրանսպորտային միջոցների փորձաքննությունների բաժնի պետ Ցոլակ Գևորգյանը:

Գլխավոր դատախազության կայքի տեղեկացմամբ՝ Գևորգյանը ձերբակալվել է անձի օգտին դրական եզրակացություն կայացնելու համար 500 ԱՄՆ դոլար կաշառք պահանջելու և ստանալու կասկածանքով, Երևանի քննչական վարչության ծանր հանցագործությունների քննության բաժնում Քրեական օրենսգրքի 200-րդ հոդվածի (առևտրային կաշառք) հատկանիշներով հարուցված քրեական գործի շրջանակներում:

«Հարուցված քրեական գործի նախաքննությունը շարունակվում է: Դատավարական ղեկավարումը իրականացնում է Երևան քաղաքի դատախազությունը»,- հայտնում է գլխավոր դատախազությունը: