Սևանա լճից արդեն վերցվել է 35,5 մլն խմ ջուր

Մայիսի 13-ի դրությամբ` Սևանա լճից արդեն վերցվել է 35,5 մլն խմ ջուր: Այս մասին տեղեկացրել է Ջրային տնտեսության պետական կոմիտեի նախագահ Անդրանիկ Անդրեասյանն այսօր՝ փոխվարչապետ, տարածքային կառավարման նախարար Արմեն Գևորգյանի մոտ այսօր կայացած խորհրդակցության ժամանակ:

Անդրեասյանը նշել է, որ, նախորդ տարվա համեմատ, այս տարի գրեթե կրկնակի նվազել է ջրամբարների լցվածության մակարդակը: Ոչ բարենպաստ եղանակով պայմանավորված՝ այս տարի Սևանա լճից ջրառն սկսվել է ապրիլի 24-ից: Մինչդեռ նախորդ տարի լճից ջրառն իրականացվել էր միայն հունիսից:

Արմեն Գևորգյանն ընդգծել է Սևանա լճից վերցվող յուրաքանչյուր խորանարդ մետր ջրի խիստ նպատակային օգտագործելու և ջրառն ավելագույնս խնայողաբար իրականացնելու անհրաժեշտությունը:

Գյուղացիական տնտեսությունների պահանջարկը բավարարելու հարցում փոխվարչապետը կարևորել է ոռոգման համակարգի ընկերությունների աշխատանքները: Այս մասին հայտնում է տարածքային կառավարման նախարարության հասարակայնության հետ կապերի բաժինը: