Գեղարքունիքի հարյուրավոր քաղաքացիներ հայտնվել են Ռուսաստան մուտքի արգելք ունեցողների ցուցակում

Գեղարքունիքի մարզպետ Ռաֆիկ Գրիգորյանը պնդում է, որ Ռուսաստանի խստացված միգրացիոն քաղաքականության պատճառով Գեղարքունիքի մարզում հարյուրավոր մարդիկ հայտնվել են անելանելի վիճակում, քանի որ նրանց մուտքը Ռուսաստան արգելված է:

Yerkir.am-ի հետ զրույցում նա կարծիք հայտնեց մեր այն դիտարկման կապակցությամբ, որ Ռուսաստանը նաև նոր օրենք է ընդունել, որով, ընդհակառակը, հեշտացվում է Ռուսաստանի քաղաքացիություն ստանալը: Մարզպետն ասաց. «Հարյուրավոր մարդիկ տոմս են վերցնում, որ գնան, բայց հայտնաբերում են, որ հայտնվել են սև ցուցակներում, դրա մասին է խոսքը, և նման մարդիկ մեր մարզում բավական մեծ թիվ են կազմում: Մարդկանց ընտանիքները Ռուսաստանում են, մարդիկ աշխատանքային պայմանագրեր ունեն Ռուսաստանում, բայց նրանք չեն կարողանում գնալ... Նման մարդկանց վերաբերյալ 20 էջանոց ցուցակ ունեմ, մարդիկ, որոնք չեն կարողանում գնալ Ռուսաստան»:

Ավելի վաղ Գեղարքունիքի մարզպետը Yerkir.am-ի հետ զրույցում ասել էր. «Էնքան ասեցիք` արտագաղթ, արտագաղթ, հիմա Ռուսաստանը խստացրել է միգրացիոն օրենսդրությունը և արգելում է որոշ քաղաքացիների` մտնել Ռուսաստան»: