Մոսկվան վտարում է կանադացի բարձրաստիճան դիվանագետին

BBC-ի ռուսական ծառայությունից տեղեկանում ենք, որ այսօր Մոսկվայում Կանադայի դեսպանատունը պաշտոնական գրություն է ստացել, ըստ որի` դեսպանատան առաջին քարտուղար Մարգարիտա Աթանասովային տրվում է 14 օր` Ռուսաստանը լքելու համար:

Մոսկվան իր այս քայլը հիմնավորել է հանգամանքով, որ օրեր առաջ Օտտավայում ռուսական դեսպանատան ռազմական կցորդի օգնական, փոխգնդապետ Յուրի Բեզլերը ևս վտարվեց Կանադայից: Դա անելու համար Կանադան փոխգնդապետին տրամադրվել էր երկու օր:

Աթանասովային Ռուսաստանից վտարելու որոշումը Մոսկվան ներկայացնում է որպես պատասխան Օտտավայի հիշյալ քայլի:

Այն ժամանակ Օտտավան իր քայլին պաշտոնական հիմնավորում չտվեց, բայց արևմտյան լրատվամիջոցներն այն պայմանավորեցին Ղրիմում և Արևելյան Ուկրաինայում Ռուսաստանի քաղաքականությամբ: