Պռոշյանցիները հրաժարվում են բացել ճանապարհը. իրավիճակը շարունակում է լարված մնալ

Ավելի վաղ Yerkir.am-ը տեղեկացրել էր, որ մի խումբ պռոշյանցիներ փակել են Երևան-Աշտարակ ճանապարհը` բողոքելով Պռոշյանի գյուղապետ Հրաչ Մուրադյանի սպանության չբացահայտման դեմ: Նշենք, որ բողոքող պռոշյանցիներին են միացել ԱԺ ՀՅԴ խմբակցության ղեկավար Արմեն Ռուստամյանը և խմբակցության քարտուղար Աղվան Վարդանյանը:

Ճանապարհը փակած գյուղացիներին ոստիկաններն առաջարկում են բացել ճանապարհը, որովհետև գլխավոր դատախազը ներկա պահին գտնվում է Տավուշի մարզում և չի կարող ներկայանալ: Ըստ ոստիկաններից մեկի՝ վաղը գլխավոր դատախազությունում պատրաստվում են ընդունել պռոշյանցիներին և քննարկել նրանց հետ բոլոր հարցերը: Սակայն պռոշյանցիները հրաժարվում են բացել ճանապարհը:

Աղվան Վարդանյանը առաջարկում է ավելի լավ տարբերակ` խոսել գլխավոր դատախազի հետ և հանդիպման համար կոնկրետ օր ու ժամ պայմանավորվել, որպեսզի դատախազն անձամբ գա Պռոշյան: