Լեհաստանում համարում են, որ Ժիրինովսկիի նամակը հոգեբույժի վերլուծության կարիք ունի

Արդեն հայտնել ենք, որ Լեհաստանի ԱԳՆ-ն ՌԴ Պետդումայից պաշտոնական նամակ է ստացել՝ Ուկրաինան բաժանելու առաջարկով: Նամակի հեղինակն է Պետդումայի նախագահի տեղակալ, Ռուսաստանի Լիբերալ-դեմոկրատական կուսակցության ղեկավար Վլադիմիր Ժիրինովսկին: Նա առաջարկել է  Լեհաստանին` հանրաքվե պահանջել Ուկրաինայի 5 արևմտյան նահանգներում՝ Վոլինի, Լվովի, Իվանո-Ֆրանկովսկի, Տերնոպոլի և Ռովնոյի, Լեհաստանին նվիրվածության հարցով: 

Լեհաստանում բավականին կոշտ են արձագանքել Ժիրինովսկիի այդ նամակին: Լեհաստանի նախագահի հումանիտար հարցերով խորհրդական Տոմաշ Նալենչը, մեկնաբանելով այդ նամակը, ասել է. «Այդ մտքերը ինչ-որ հիվանդ երևակայության արդյունք են: Ինչպե՞ս կարելի է Լեհաստանին առաջարկել մասնակցել բարեկամական երկրի բաժանման գործին: Ժիրինովսկիի այդ «պաշտոնական» ուղերձը պետք է ենթարկվի հոգեբուժական վերլուծության»: