Սեյրան Օհանյանի թիկնապահները խոչընդոտում էին լրագրողների աշխատանքին

Այսօր Վազգեն Սարգսյանի 55-ամյակի կապակցությամբ «Եռաբլուր» պանթեոն այցի ժամանակ պաշտպանության նախարար Սեյրան Օհանյանին մոտեցան մի քանի քաղաքացիներ` տարբեր խնդրանքներով`թոշակի բարձրացումից մինչև նոր ընդունելություն, փոխանցելով նրան փաստաթղթեր, դիմումներ ու նամակներ:

Մի կին դժգոհում էր, որ նախարարն իրեն չի ընդունել, ինչին Սեյրան Օհանյանը պատասխանեց, որ նման բան հնարավոր չէ` եթե գործերն ուսումնասիրված են, ապա ինքը քաղաքացիներին հրավիրում է ընդունելության: Նախարարին մոտեցավ նաև զոհված ազատամարտիկի կին՝ գրկին երեխա: Նա խնդրում էր բարձրացնել իր թոշակը: Սեյրան Օհանյանը պատասխանեց. «Եղավ, բարձրացրել ենք, մի քիչ էլ կբարձրացնենք»:

Նշենք, որ լրագրողների աշխատանքին դիտմամբ խոչընդոտում էին նախարարի թիկնապահները: Նրանք կանգնում էին տեսախցիկների դիմաց, հրում լրագրողներին ու օպերատորներին, հրամայում հետ գնալ, չմոտենալ և այլն: