Վարչապետի փոփոխությամբ բան չի փոխվի այս երկրում. Ռուբեն Հակոբյան

ԱԺ ավանդական ճեպազրույցում լրագրողները «Ժառանգություն» խմբակցության ղեկավար Ռուբեն Հակոբյանից հետաքրքրվեցին, թե ինչո՞ւ կառավարությանն անվստահության հայտնելու հարցը այդպես էլ չմտավ խորհրդարան: Նրա խոսքով՝ չորս ուժերը շատ լրջորեն են քննարկում կարևոր հարցերը, և անհրաժեշտ է ճիշտ ձևակերպված փաթեթային օրակարգ, որը կպատասխանի այն հարցին, թե ինչպե՞ս են պատկերացնում իշխանափոխությունը և ինչպե՞ս հասնել դրան:

«Վարչապետի փոփոխությամբ իսկապես բան չի փոխվի այս երկրում: Իհարկե, կառավարության անդամները պետք է հեռանան, բայց Պողոսի փոխարեն գա Պետրոսը, ոչինչ չի փոխի: Չորս ուժերը շատ լուրջ քննարկում են երկրում արմատապես վիճակ փոխելու հարցը, մշակվում է օրակարգ: Այնպես որ` չեմ կիսում այն լրատվամիջոցների հրճվանքը, թե ՝ տեսեք, չկարողացան համաձայնության գալ»,- ասաց Ռուբեն Հակոբյանը: