Իսկ մեր իշխանավորները ոսկեզօծ զուգարաններ ունե՞ն. պատասխանում է Գալուստ Սահակյանը

ԱԺ-ում լրագրողները ՀՀԿ խմբակցության ղեկավար Գալուստ Սահակյանից հետաքրքրվեցին, թե հնարավո՞ր է, որ Հայաստանում էլ բացահայտվեն իշխանավորների հսկայական ունեցվածքներ, ինչպես դա եղավ Ուկրաինայի նախագահի եւ մի շարք այլ պաշտոնյաների դեպքում: «Չեմ կարծում, որ Հայաստանում նման անձեր կան, համենայն դեպս, իմ տեսադաշտում չկան, և չեմ կարծում, որ հայկական իրականությունն այնպիսին է, որ կարող են մտնել հայերի տները ու ահաբեկել, առավել ևս՝ ընտանիքների առումով, որովհետև մենք ընտանիք պաշտող ժողովուրդ ենք»,- ասաց Գալուստ Սահակյանը:

Ինչ վերաբերում է Յանուկովիչի դղյակում հայտնաբերված ոսկեզօծ բաղնիքներին ու զուգարաններին, Գալուստ Սահակյանը նշեց, որ ո'չ Յանուկովիչն է իր կուսակցությունից, ո'չ էլ ինքը՝ Յանուկովիչի կուսակցությունից: Նրա խոսքով՝ ամեն ազգ իր խնդիրներն ունի:

Լրագրողների դիտարկմանը, թե ասում են, որ մեզ մոտ էլ իշխանավորներ կան, որ նման դղյակներ ունեն, Գալուստ Սահակյանը պատասխանեց. «Ասում են… Դուք էլ հակառակն ասեք»: