Պլյուշչենկոյին ստիպել են սահադաշտ դուրս գալ

Գեղասահքի կրկնակի օլիմպիական չեմպիոն Եվգենի Պլյուշչենկոն CNN-ին հայտնել է, որ չէր ցանկանում Սոչի-2014-ում մասնակցել անհատական մրցաշարին, սակայն Ռուսաստանի գեղասահքի ֆեդերացիան պահանջել է նրանից, որ նա մասնակցի, քանի որ մեդալի իրական հավակնորդը հենց Պլյուշչենկոն էր:

31-ամյա գեղասահորդը պատմել է, որ թիմային մրցումների ժամանակ արդեն իրեն վատ է զգացել, մկանային ցավեր է ունեցել: Այդ մասին նա տեղեկացրել  է Ռուսաստանի գեղասահքի ֆեդերացիային, սակայն նրան ստիպել են դուրս գալ սահադաշտ։

«Եղելությունը բացատրել չեմ կարող:  Ավելի լավ է` հարցնեք Ռուսաստանի գեղասահքի ֆեդերացիայի նախագահին: Ինձ ստիպել են մասնակցել մրցումներին, քանի որ մեդալ նվաճելու մեծ հնարավորություններ ունեի։ Թիմային մրցումներից հետո ֆեդերացիայի ներկայացուցիչներին ասացի, որ ինձ այնքան էլ լավ չեմ զգում` մկանային ցավեր ունեի: Խնդրեցի, որ ինձ փոխարինեն: Սակայն նրանք ինձ պատասխանեցին, որ ինչ եղել՝  եղել է»,- ասել է Պլյուշչենկոն։

Հիշեցնենք, որ օլիմպիական կրկնակիի չեմպիոնը  վնասվածքի պատճառով հանվել էր Սոչի-2014-ի  անհատական մրցաշարից, ինչից հետո հայտարարել էր սպորտային կարիերան ավարտելու մասին։