Ըստ Հովիկ Աբրահամյանի` նախագահն էլ, վարչապետն էլ, ինքն էլ շահագրգռված են

ԱԺ նախագահ Հովիկ Աբրահամյանը, խոսելով գազային պայմանագրերի ուսումնասիրման նպատակով ժամանակավոր հանձնաժողով ստեղծելու մասին ՀԱԿ խմբակցության նախաձեռնության մասին, նշեց, որ ճիշտ կլիներ տեխնիկապես այլ կերպ դա կազմակերպել: ԱԺ նախագահի խոսքով՝ անհրաժեշտ էր դիմել նախ իրեն և քաղաքական մեծամասնությանը այդ առաջարկով, իսկ այսպես ստացվում է, որ քաղաքական մեծամասնությունը շահագրգիռ չէ գազային պայմանագրերի ուսունասիրման հարցով:

«Երկրի նախագահն էլ, վարչապետն էլ, բոլորս էլ շահագրգռված ենք, որ ուսունասիրվի ամեն ինչ, և եթե կան մեղավորներ, պատժվեն: Բայց կարող էիք ինձ հետ քննարկել նաև»,- ասաց Հովիկ Աբրահամյանը:

Նշենք, որ ԱԺ նիստն ավարտվեց «Ժառանգության» խմբակցության ղեկավար Ռուբեն Հակոբյանի առաջարկով, որպեսզի խմբակցությունների հայտարարությունները շարունակվեն վաղը: Հովիկ Աբրահամյանը, դիմելով Ռուբեն Հակոբյանին, ասաց. «Աստված չարասցե, եթե դուք լինեիք մեծամասնություն, ես արդեն պատկերացնում եմ` ինչ կլիներ մեր վիճակը»: