Տավուշի սահմանամերձ գյուղերում երեք ամբուլատորիա կբացվի

2013-ին առողջապահության նախարարությունը շինարարության ոլորտում ունեցել է 1 մլն 650 000 դոլարին համարժեք դրամի չափով խնայողություն: Այս մասին լրագրողների հետ զրույցում հայտնեց ՀՀ առողջապահության նախարար Դերենիկ Դումանյանը:

Ըստ նրա` խնայված գումարի հաշվին այս տարի եւս 6 ամբուլատորիա կկառուցվի, որոնցից 3-ը` Տավուշի սահմանամերձ գյուղերում:

«Բացի այդ` կվերակառուցվեն Ճամբարակի հիվանդանոցը, Մեծամորի պոլիկլինիկան, ինչպես նաեւ տասը շտապօգնության մեքենաներ կվերանորոգվեն եւ կտրամադրվեն սահմանամերձ գյուղերի ամբուլատորիաներին»,- ասաց նախարարը:

Նա տեղեկացրեց նաեւ, որ փետրվարի 1-ին կբացվի Աբովյանի բժշկական կենտրոնը, իսկ քիչ ավելի ուշ Ալավերդիում նույնպես բժշկական կենտրոն կբացվի: 2014-ին, Դումանյանի հավաստմամբ, կավարտվի Բերդի հիվանդանոցի շինարարությունը, ինչպես նաեւ Մեղրիի, Կապանի, Վանաձորի հիվանդանոցների շինարարությունը: Այս բոլոր բուժհաստատությունները, ինչպես տեղեկացրեց նախարարը, կապահովվեն նորագույն սարքավորումներով ու անհրաժեշտ կահույքով: