Կառավարությունը մարտադաշտ կնետի նաև իր երկու ամազոնուհիներին

Ռ. Քոչարյանի դեմ կենաց-մահու ճակատամարտում իշխանությունները որդեգրել են «լեգեոն առ լեգեոն» մարտնչելու մարտավարությունը: Երկրորդ նախագահի որոշ գրոհներ օրեր առաջ դիմագրավեց, օրինակ, Արմեն Մովսիսյանի հրամանատարությամբ գործող լեգեոնը, սոցիալական թեմաներով քոչարյանական արշավանքի դեմը փորձեց առնել Արտեմ Ասատրյանի լեգեոնը, հիմա ուղղակի կարելի է կռահել, թե ով կլինի հաջորդը:

Չի բացառվում, որ վերջին պահին կառավարությունը ճարահատ մարտադաշտ նետի նաև իր երկու ամազոնուհիներին, մանավանդ, որ նրանցից մեկը դեռ պարմանուհի հասակից կռվել ու հասցրել է լինել բոլոր հնարավոր «մարտադաշտերում» և պայքարի ահռելի փորձ ունի: Մյուս ամազոնուհին, ճիշտ է, պայքարի փորձ չունի, բայց իր լեգեոնի ու նրա տիրույթում գտնվողների համար փորձանք դառնալու մեծ հնարավորություն ունի:

Լեգեոնների հարձակումները թևերից պաշտպանում են մինչև 40 տարեկան սերժանտները՝ հանապազ կրակի տակ պահելով թշնամուն, վերջինիս «ահու»՝ նույնիսկ փուչիկներ տրաքացնելով: Եվ մինչ մյուս մարտական լեգեոնները հերթագրված սպասում են իրենց ժամին, հրամանատարն, ասում են, էլի ինչ-որ գույնզգույն քարտեզներ կազմելու հետ է:

Լ.Ս.