Ռուսաստանն Ուկրաինային 20 մլրդ դոլար չի խոստացել

Ռուսաստանն Ուկրաինային 20 մլրդ դոլար չի խոստացել ԵՄ-ի հետ Ասոցացման պայմանագրից հրաժարվելու դիմաց: Այդ մասին ICTV հեռուստաալիքին տված հարցազրույցում հայտնել է երկրի վարչապետ Նիկոլայ Ազարովը:

«Նման պատասխանատու իրավիճակում չի կարելի ստել սեփական ժողովրդին: Թող Յացենյուկը մոտենա Գերագույն ռադայի ամբիոնին և ցույց տա այն փաստաթուղթը, որն ապացուցում է իր խոսքերը»,- ասել է նա:

Հիշեցնենք, որ Ուկրաինայի ընդդիմադիր «Բատիկիվշչինա» խմբակցության ղեկավար Արսենի Յացենյուկը հայտարարել է, որ նախագահ Վիկտոր Յանուկովիչը ռուսական իշխանություններից «կորզել է» 20 մլրդ դոլար, որի մի մասը կօգտագործվի 2015-ին նրա վերընտրման համար: Այդ գումարի դիմաց, Յացենյուկի խոսքերով, Յանուկովիչը հրաժարվել է ԵՄ-ի հետ Ասոցացման համաձայնագրից: