''Ստեփանյան''` նոր անուն մարմնամարզական տարրերի համաշխարհային անվանացանկում

Բելգիայի Անտվերպեն քաղաքում ընթանում է սպորտային մարմնամարզության աշխարհի անհատական առաջնությունը:

Հայաստանի պատվիրակներ Հարություն Մերդինյանը  և Վահագն Ստեփանյանը  հանդես եկան նժույգ թափերում: Նրանցից առաջինը գրավեց 9-րդ, իսկ երկրորդը` 13-րդ տեղը:

Այս ամենով հանդերձ, մարմնամարզության հայկական դպրոցն  իր հաշվին  համաշխարհային նոր նվաճում գրանցեց: Վահագն Ստեփանյանը նժույգ թափում  խստապահանջ  մրցավարական հանձնախմբին ներկայացրեց իր ստեղծած նոր կապակցությունը`  ուղիղ խաչաձևումով կանգ ձեռքերին, ապա ` հակադարձ խաչաձևում: Երևանցու կատարումը ուղեկցվեց բուռն ծափահարություններով, արժանացավ բարձր գնահատականի, ընդգրկվեց մարմնամարզական  բարդ տարրերի և կապակցությունների միջազգային անվանակարգում:

Հայկական կատարումը  ստացավ «Ստեփանյան» անունը, իսկ  Վահագնին հանձնվեց հատուկ հավաստագիր:

Հարկ է նշել, որ օլիմպիական չեմպիոններ Հրանտ Շահինյանից, Ալբերտ  Ազարյանից և աշխարհի չեմպիոն Արթուր Հակոբյանից հետո Վահագնը հայաստանցի չորրորդ  մարմնամարզիկն է,  ում անունը  գրանցում ստացավ մարզաձևի համաշխարհային անվանակոչության պատմագրքում:

ՀԱՕԿ լրատվության բաժին