Եգիպտոսը հնարավոր է ճանաչի Հայոց ցեղասպանությունը

Մոհամեդ Մուրսիի պաշտոնանկությունից հետո Եգիպտոսը կարող է դառնալ առաջին մուսուլմանական երկիրը, որ կճանաչի 1915 թվականին Օսմանյան կայսրությունում իրականացված  Հայոց ցեղասպանությունը: Այդ մասին, ինչպես հայտնում է inosmi.ru-ն, գրում է Վատիկանի գործունեությունը լուսաբանող Vatican Insider կայքը:

Դա կարող է տեղի ունենալ փաստաբան, Եգիպտոսի Ժողովրդական ճակատ ինստիտուտի ղեկավար Մուհամեդ Սաադ Խաիրալլահի աննախադեպ քայլից հետո. նա այդ հարցով դատական հայց է ներկայացրել: Գործը պատմության մեջ առաջին անգամ կքննվի Կահիրեում նոյեմբերի 5-ին: Այդ մասին հայտարարվել է Եգիպտոսում և արաբական աշխարհում մեծ ճանաչում ունեցող «Ամբողջական լուսանկար» թոք-շոուի-ի ժամանակ, որը վարում է Լիլիան Դաուդը: Նաև առաջարկ է հնչել Հայոց ցեղասպանության զոհերի հիշատակին նվիրված հուշարձան կանգնեցնել մայրաքաղաք Կահիրեում:

Բանն այն է, որ Մուրսիի պաշտոնանկությունից հետո Թուրքիայի վարչապետ Ռեջեփ Թայիփ Էրդողանը խիստ քննադատության է արժանացրել ներկայիս կառավարությանը, ինչը եգիպտացիների մեծամասնությանը դուր չի եկել: