Ազատամարտիկների ավանդները կփոխհատուցվեն

Ազատամարտիկների ավանդները փոխհատուցելը  կարևորագույն սոցիալական խնդիրներից մեկն է. այսօր լրագրողների հետ հանդիպման ժամանակ ասաց ՕԵԿ-ական պատգամավոր Հովհաննես Մարգարյանը:

Ըստ նրա` Հայրենական մեծ պատերազմի վետերանների և Արցախյան ազատամարտի մասնակիցների ավանդների փոխհատուցման սոցիալական նախագիծն արդեն կազմված է և կառավարության քննարկմանը կդրվի հոկտեմբեր-նոյեմբեր ամիսներին կայանալիք բյուջետային քննարկումներից անմիջապես հետո:

«Այս փաթեթը վերաբերում է մինչև 1992 թվականի հունվարի 1-ը ներառյալ ավանդներ ներդրած ազատամարտիկներին: Փաթեթը արտոնություններ է նախատեսում նաև Չեռնոբիլի աղետի հետևանքների վերացման աշխատանքներին մասնակցածների համար»,- ասաց Հովհաննես Մարգարյանը:

Հարցին, թե Արցախյան պատերազմին չմասնակցած, բայց պատերազմի մասնակցությունը վկայող փաստաթղթեր ունեցող ինքնակոչները նույնպե՞ս ստանալու են փոխհատուցում, պատգամավորը պատասխանեց, որ Հայաստանը փոքր երկիր է, և ազատամարտիկի կոչումը կրելու իրավունք չունեցողները շատ արագ կարող են բացահայտվել:

Հովհաննես Մարգարյանի խոսքերով` այս նախագծի առաջարկն արել են ազատամարտիկները: «Մենք չենք հերքում, որ մարդիկ, ովքեր իրենց կյանքն են վտանգել հանուն բոլորիս, այսօր արժանավայել կյանքով չեն ապրում, սակայն դա ամենևին չի նշանակում, որ ՀՀ կառավարությունն անտեսում է ազատամարտիկների խնդիրները և քայլեր չի ձեռնարկում իրավիճակը շտկելու համար»,- ասաց նա: