Արդարությունը վերականգնվեց. պատգամավորը` Սուրեն Խաչատրյանի որդու ազատ արձակման մասին

Արդարությունը վերականգնվեց. Yerkir.am-ի հետ զրույցում նշեց Սյունիքի մարզից մեծամասնական ընտրակարգով ընտրված Հայկ Գրիգորյանը` անդրադառնալով Սյունիք մարզպետի որդու եւ թիկնապահի ազատ արձակման փաստին:

«Ես ի սկզբանե գիտեի, ես ի սկզբանե համոզված էի, որ Տիգրան Խաչատրյանը անմեղ է, որովհետեւ նա հարկադրված պաշտպանություն է կիրառել»,- ընդգծեց պատգամավորը:

Մեր դիտարկմանը, որ ինքնապաշտպանության դեպքում մարդուն մի քանի կրակոցով չեն սպանում, կարելի է, օրինակ, ոտքին կրակել, Գրիգորյանը կրկին շտապեց արդարացնել մարզպետի որդուն: «Դեպքը տեղի է ունեցել կեսգիշերին, մթության մեջ, եւ, բացի այդ, այնտեղ խուճապ է եղել, եւ այդ խուճապի արդյունքում նման բան է եղել»,- ասաց պատգամավորը:

Դիտարկմանը, որ չեն դադարում խոսակցությունները, որ Սուրեն Խաչատրյանն իր փոխարեն պատգամավոր է դառնալու, Գրիգորյանը պատասխանեց, որ հիմա նման բան չկա, խոսակցություն չկա, բայց որեւէ բան բացառել, իհարկե, չի կարող: