Երբեմն ստիպված ենք եղել կրկնօրինակել այս կամ այն օրենքը. խոստովանում է արդարադատության նախարարը

Քրեակատարողական ծառայությունը շարունակում է ամենախոցելի ոլորտը մնալ նախարարությունում: Այս մասին լրագրողների հետ հանդիպման ժամանակ հայտարարեց ՀՀ արդարադատության նախարար Հրայր Թովմասյանը' մտահոգիչ համարելով հատկապես քրեակատարողական հիմնարկների գերբեռնվածության խնդիրը:

Նախարարը միաժամանակ հույս հայտնեց, որ մինչև հաջորդ տարվա երրորդ եռամսյակը պատրաստ կլինի Արմավիր քրեակատարողական հիմնարկը, իսկ մոտ ապագայում  12 ՔԿՀ-ի փոխարեն Հայաստանում կգործի 5-6-ը, բայց` ավելի հարմարավետ եւ ընդարձակ:

Ըստ Թովմասյանի` նախարարությանը երբեմն վերագրվում են չարած գործեր, որոնք իրենց գործառույթների մեջ չեն մտնում, այլ վերաբերում են, օրինակ, դատական համակարգին, Հարկադիր կատարման ծառայությանը և այլն: «Դժվար է գտնել մի նախարարություն, որի լիազորություններն այսքան տարաբնույթ են»,- ասաց նա և հավելեց, որ իրենց գլխավոր խնդիրը օրենսդրության բարելավումն է:

Թովմասյանը խոստովանեց, որ երբեմն ստիպված են եղել կրկնօրինակել այս կամ այն երկրի օրենքը` հաշվի չառնելով մեր երկրի առանձնահատկություններները, բայց նաև փաստեց` վերջին տարիներին այդ ոլորտում արձանագրված ձեռքբերումներ կան: