Պռոշյանցիները մտան ոստիկանություն

«Արցախի և մեր պետականության մարմնավորում Հրաչ Մուրադյանին սպանողը պիտի պատժվի»: Այս գրությամբ պաստառները պարզած` քիչ առաջ  ՀՀ ոստիկանության գլխավոր վարչության դիմաց բողոքի ակցիա էին կազմակերպել Պռոշյան համայնքի ղեկավար Հրաչ Մուրադյանի հարազատները և ընկերները:

Նշենք, որ այսօր լրանում է Հրաչ Մուրադյանի  սպանության հինգերորդ ամիսը, սակայն մեղավորները դեռ պատժված չեն։ Պռոշյանցիների խոսքով` 5 ամիսը բավարար ժամկետ է հանցագործությունը բացահայտելու համար: Ակցիայի մասնակիցները ցանկություն հայտնեցին ոստիկանապետ Վլադիմիր Գասպարյանից անձամբ լսել, թե  հանցագործությունը բացահայտելու ուղղությամբ ինչ աշխատանքներ են տարվում և ինչ հունով է ընթանում գործի քննությունը:

Ոստիկանությունից  պատրաստակումություն հայտնեցին ընդունել ակցիայի մասնակիցներից 4-ին: 3 պռոշյանցիներ, ԱԺ  ՀՅԴ խմբակցության քարտուղար Աղվան Վարդանյանի ուղեկցությամբ, մտան ոստիկանության գլխավոր վարչության շենք` ներկայացնելու իրենց պահանջները: