Ֆրանսիայի ՆԳ նախարարը քննադատել է ԱՄՆ հետախուզության գործունեությունը

Ֆրանսիայի ներքին գործերի նախարար Մանուել Վալսը, Փարիզում ԱՄՆ դեսպանատանը Անկախության օրվա կապակցությամբ ելույթ ունենալով, առիթը բաց չի թողել ամերիկյան հետախուզական ծառայության գործունեությունը ԵՄ երկրներում քննադատելու համար. տեղեկացնում է Associated Press-ը:

«Նման քաղաքականություն, եթե ենթադրությունները հաստատվեն, չպետք է գոյություն ունենա դաշնակիցների եւ գործընկերների միջեւ: Հանուն մեր բարեկամության` մենք պետք է ազնիվ լինենք միմյանց նկատմամբ»,- հայտարարել  է նա:

Եվրոպական մի շարք ԶԼՄ-ներ ավելի վաղ տեղեկացրել էին, որ ԱՄՆ անվտանգության ծառայության գործակալությունը գաղտնալսել է ԵՄ անդամ երկրների ներկայացուցիչների խոսակցությունները, մասնավորապես` էլեկտրոնային լրտեսություն է իրականացրել Վաշինգտոնում մի շարք երկրների դեսպանատներում: