Չապմանը Սնոուդենին առաջարկել է սիրտն ու ձեռքը

Ռուսաստանցի նախկին լրտեսուհի Աննա Չապմանը ԿՀՎ նախկին գործակալ Էդվարդ Սնոուդենին առաջարկել է ամուսնանալ իր հետ: Twitter-ի իր միկրոբլոգում նա գրել է. «Սնոուդե'ն, դու կամուսնանա՞ս ինձ հետ». տեղեկացնում է bfm.ru-ն:

Չապմանի հաղորդագրությունը արտասահմանյան մամուլում բազմաթիվ կատակների աղբյուր է դարձել. սկսել են զուգահեռներ անցկացնել լրտեսական հայտնի վեպերի ու ֆիլմերի հետ:

Աննա Չապմանը ձերբակալվել էր 2010 թվականի ամռանը ԱՄՆ-ում` Ռուսաստանի համար լրտեսություն անելու մեղադրանքով: Նա ընդունել էր իր մեղքը: Չապմանին եւ  այդ գործով մեղադրվող եւս 9 հոգու փոխանակել էին 4 ռուսաստանցիների հետ, որոնք էլ մեղադրվում էին հօգուտ ԱՄՆ-ի եւ Մեծ Բրիտանիայի լրտեսություն անելու մեջ: