Հունգարիայի ՍԴ նախագահը ներողություն խնդրեց հայ ժողովրդից

Եվրոպայի խորհրդի Նախարարների կոմիտեում Հայաստանի նախագահության ստանձնման շրջանակներում այսօր Ազգային ժողովի նիստերի դահլիճում իր աշխատանքները սկսեց «Իրավունքի գերակայության եվրոպական չափորոշիչները եւ իշխանությունների հայեցողության սահմանները ԵԽ անդամ երկրներում» խորագրով համաեվրոպական խորհրդաժողովը: Խորհրդաժողովին մասնակցող 32 երկրների եւ միջազգային կառույցների ավելի քան 80 ներկայացուցիչների թվում է նաեւ Հունգարիայի ՍԴ նախագահ Պետեր Պացոլաին:

Այսօր ԱԺ-ում լրագրողների խնդրանքով անդրադառնալով Հունգարիայի կողմից ադրբեջանցի մարդասպան Ռամիլ Սաֆարովի արտահանձման փաստին` Պացոլաին թեեւ ընդգծեց, որ չի ներկայացնում պաշտոնական Հունգարիան, տեղյակ չէ արտահանձման նախապատմությանը, նրբություններին, բայց ուզում է իր անունից ներողություն խնդրել հայ ժողովրդից ստեղծված խնդրի համար:

Հունգարիայի ՍԴ նախագահը տեղեկացրեց, որ Հունգարիայի ղեկավարությունն ակնկալում էր, որ Սաֆարովը Ադրբեջանում կշարունակի կրել իր մնացած պատիժը, բայց Ադրբեջանն ազատ արձակեց եւ հերոսացրեց Սաֆարովին, ինչն էլ, ըստ Պացոլաիի, զարմացրել է Հունգարիայի իշխանություններին: Հունգարիան, ըստ նրա, նման բան չէր սպասում: