Տավուշի մարզպետը բացահայտեց իր դիմացկունության գաղտնիքը

Այսօր ԱԺ-ում, լսելով իր հնարավոր պաշտոնանկության մասին հարցը, Տավուշի մարզպետ Արմեն Ղուլարյանը նախ մի լավ ծիծաղեց, հետո հայտարարեց. «Դիմացկուն պետք է լինել, դիմացկուն»:

Yerkir.am-ը փորձեց պարզել ամենաերկարը իր պաշտոնում մնացած մարզպետի դիմացկունության գաղտնիքը: «Առավոտյան շուտ վեր կենալ, զբաղվել սպորտով, լինել բարի, արդար, խոստումը կատարող եւ երբեք չդավաճանել ընկերներին ու թիմին»,- հայտարարեց մարզպետը:

Մեր ճշտող հարցին, թե դա նպաստո՞ւմ է մարզպետի աթոռը երկար տարիներ պահելուն, Ղուլարյանը պատասխանեց` դա նշանակում է դիմացկուն լինել: Նա հիշեցրեց, որ այս կյանքում ոչինչ հավերժ չէ: «Մի օր կլինի, բայց ես կարծում եմ, որ դեռեւս աշխատում եմ»,-ասաց մարզպետը:

Մեր այն դիտարկմանը, որ Արմավիրի մարզպետ Աշոտ Ղահրամանյանը վստահեցնում է, որ իր պաշտոնանկության հարցը երբեք օրակարգում չի եղել եւ չկա, Ղուլարյանն արձագանքեց. «Պարոն Ղահրամանյանը գեներալ մարդ է, որ ասում է` տենց էլ կա… Չնայած` ես էլ գնդապետ եմ, ի՞նչ տարբերություն»: