Նախնական վարկածով Եղվարդի ոստիկանապետն ինքնասպան է եղել

Ոստիկանության Եղվարդի բաժնի պետ Կորյուն Հարությունյանը,  ըստ նախնական վարկածի, ինքնասպան է եղել: Այս մասին yerkir.am-ին հայտնեցին ոստիկանությանը մոտ կանգնած աղբյուրները:

Գնդապետ Կորյուն Հարությունյանը ժամանակին աշխատել է ոստիկանության Կոտայքի բաժնում: Նա աչքի է ընկել` ոչ միայն մարզի, այլև Հայաստանի մասշտաբով կարևոր հանցագործություններ բացահայտելով: Իսկ ոստիկանության Եղվարդի բաժնի պետի պաշտոնին, ինչպես արդեն հայտնել էինք, նշանակվել է 2013-ի ապրիլի 19-ին: Մինչ այդ նա աշխատել է ՀՀ ոստիկանության պետական պահպանության գլխավոր վարչությունում:

Ավելի վաղ տեղեկացրել էինք, որ այսօր առավոտյան Հրազդան քաղաքի գերեզմանատանը հայտնաբերվել է Եղվարդի ոստիկանապետ, ոստիկանության գնդապետ Կորյուն Հարությունյանի դին՝ գլխի շրջանում հրազենային վնասվածք: Ոստիկանապետի մահվան փաստի առթիվ Հատուկ քննչական ծառայությունում հարուցվել է քրեական գործ, կատարվել է դեպքի վայրի զննություն, նշանակվել են մի շարք փորձաքննություններ: Նախաքննությունը շարունակվում է: