Շիրակում երկու երեխա է մահացել պայթյունից

Քիչ առաջ ողբերգական դեպք է տեղի ունեցել Շիրակի մարզում:

Ֆոտոլրագրող Գագիկ Շամշյանը հայտնում է, որ ժամը 12:40-ի սահմաններում ոստիկանության Շիրակի մարզային վարչության Ախուրյանի բաժին ահազանգ է ստացվել, որ Հովհանի և Վահրամաբերդ գյուղերի միջև ընկած տարածքում՝ ռուսական զորքերի տանկային հրաձգարանի տարածքում, մահացած երեխաներ կան:

Ֆոտոլրագրողը հայտնում է, որ նշված վայր են ժամանել ոստիկանության Ախուրյանի բաժնի օպերատիվ խումբը՝ Ախուրյանի ոստիկանապետ Գևորգ Թադևոսյանի գլխավորությամբ:

Ժամանել են նաև ոստիկանության քննչական գլխավոր վարչության Շիրակի մարզի քննչական բաժնի Ախուրյան քննչական բաժնի քննիչները՝ քննիչ Արթուր Այվազյանի գլխավորությամբ:

Օպերատիվ-քննչական խումբը նշված հատվածում հայտնաբերել է Վահրամաբերդ գյուղի բնակիչներ` 15-ամյա Մուշեղ Գևորգյանի և 12-ամյա Արթուր Մկրտչյանի դիերը:

Ըստ Գ Շամշյանի՝ երեխաները ոչխարի հոտը արածացնելիս են եղել, երբ տանկային հրաձգարանի տարածքում պայթուցիկ զինամթերք են հայտնաբերել, ինչից հետո առաջացել է պայթյուն: Նշված տարածքը 45 տարով վարձակալական հիմունքներով տրամադրվել է ՌԴ զինված ուժերին: