Ջհանգիրյանը սուրճի բաժակ նայող չէ

Եթե մայիսին կայանալիք` Երեւանի ավագանու ընտրություններում ՀԱԿ-ը բավարար չափով քվեներ հավաքի, ապա քաղաքապետ կդառնա ՀԱԿ ցուցակը գլխավորող, Երեւանի նախկին քաղաքապետ Վահագն Խաչատրյանը: Այս մասին ԱԺ ավանդական ճեպազրույցում հայտարարեց ԱԺ ՀԱԿ խմբակցության պատգամավոր Գագիկ Ջհանգիրյանը:

Yerkir.am-ի դիտարկմանը, թե` իր կարծիքով` քանի՞ տոկոս ձայն կարող է հավաքել ՀԱԿ-ը, Ջհանգիրյանը պատասխանեց. «Հո ես սուրճի բաժակ նայող չեմ: Որքան ժողովուրդը վստահում է մեզ, այնքան քվե էլ կստանանք»:

Իսկ մեր հարցին, թե` որքանո՞վ է իրատեսական համարում, որ հետընտրական փուլում` արդեն ավագանու կազմում կոալիցիա ձեւավորվի ոչ իշխանական ուժերի միջեւ, Ջհանգիրյանը պատասխանեց, որ չի բացառում, որ ընդդիմադիր ուժերը, նաեւ` ԲՀԿ-ն, ինչ-որ դաշնակցային համաձայնությունների մեջ կարող են կմտնել:

Իսկ հավատո՞ւմ է, որ այս ընտրությունները կարող են իրապես լինել ազատ եւ արդար: ՀԱԿ պատգամավորը հայտարարեց. «Ես միայն Աստծո գոյությանն եմ հավատում»: