Հռոմի պապը մանուկ տարիքում անհանգիստ երեխա է եղել

Հռոմի պապ Ֆրանցիսկը մանուկ տարիքում շատ անհանգիստ երեխա է եղել: «Իսկական փոքրիկ սատանա էր, չլսող, ինչպես ցանկացած տղեկ: Ո՞վ իմանար, որ Հռոմի պապ է դառնալու»,- պատմել է նրա ուսուցչուհին` քույր Մարթա Ռաբինոն:

Ըստ նրա` նոր պոնտիֆիկոսը համեստ, կշռադատող, հանգիստ մարդ է` հարուստ ներաշխարհով ու կյանքի ամուր դիրքորոշմամբ: «Այսուհետ ավելի շատ ենք նրա համար աղոթելու: Նրա ընտրությունն անգնահատելի ընծա է եկեղեցուն: Դա բաց պատուհանից մի ումպ թարմ օդ է»,- ասել է Ռաբինոն:

Պարզվում է` պատանի տարիքում Հռոմի պապը թոքաբորբով է հիվանդացել, հարկ է եղել նույնիսկ հեռացնել աջ թոքի վերին հատվածը: Ի դեպ, հենց հիվանդությունից հետո է նա իրեն նվիրել կրոնին. տեղեկացնում է Вести-ն:

Էլ ի՞նչ է հայտնի Ֆրանցիսկի մասին. սիրում է տանգո, չի թաքցնում, որ երիտասարդ տարիքում հարսնացու է ունեցել, սեղանի գրքերն են Ալեսանդրո Մանձոնիի «Նշանվածները», Դանթե Ալիգիերիի «Աստվածային կատակերգությունը»: Սիրում է նաեւ Դոստոեւսկի: