Ադրբեջանի գրողների միությունում ծեծկռտուք է եղել Այլիսլիի վեպի պատճառով

Երեկ երեկոյան Ադրբեջանի գրողների միությունում ծեծկռտուք է սկսվել Աքրամ Այլիսլիի «Քարե երազներ» աղմկահարույց վեպի պատճառով. տեղեկացնում է Regnum գործակալությունը` վկայակոչելով ադրբեջանական Bizim yol թերթը:

Գրողների եւ գրաքննադատների հանդիպման ժամանակ քննադատ Ասադ Ջահանգիրը իր աջակցությունն է հայտնել Այլիսլիին, ինչն առաջացրել է գրող Էլչին Հուսեյնբեկլիի զայրույթը: Նրանց միջեւ վեճ է ծագել, որի ընթացքում գրաքննադատը շիշ է նետել գրողի կողմը: Շիշը, դիպչելով պատին, կոտրվել է, բեկորներից վիրավորվել է գրողների միության քարտուղարը:

Հիշեցնենք, որ «Քարե երազներ» ստեղծագործությունը նվիրված է Ադրբեջանական ԽՍՀ-ում բնակված հայերին: Նախաբանում գրված է. «Նվիրվում է իմ երկրացիների հիշատակին, որոնք իրենցից հետո թողեցին անարցունք մնացած ցավ»: Վեպում զուգահեռներ են տարվում 1919 թվականին Ագուլիսի հայերի ոչնչացման եւ Սումգայիթի ու Բաքվի կոտորածների միջեւ: