Բաքուն բողոքի նոտա է հղել Մոսկվային

Բաքուն բողոքի նոտա է հղել Մոսկվային. հայտնում է Apa.az լրատվական կայքը: Ադրբեջանում Ռուսաստանի դեսպան Վլադիմիր Դորոխինն այօր կանչվել է երկրի արտգործնախարարություն, որտեղ նրան են հայտնել պաշտոնական Բաքվի դժգոհությունը «Ռիա Նովոստի» պետական լրատվական գործակալությունում հրապարակված «Լեռային Ղարաբաղը 25 տարիների ընթացքում սովորել է չճանաչված մնալուն» վերլուծական հոդվածի համար:

Հաղորդվում է նաեւ, որ բողոքի նոտայից հետո այդ հոդվածը հանվել է ռուսական կայքից:

Բաքուն հիշեցրել է Մոսկվային 1997թ. Ռուսաստանի եւ Ադրբեջանի միջեւ կնքված «Բարեկամության, համագործակցության եւ փոխադարձ անվտանգության մասին» պայմանագիրը` ընդգծելով այն կետը, համաձայն որի` երկու կողմերը պետք է չթույլատրեն եւ կանխեն երկու երկրների անկախությանը եւ տարածքային ամբողջականությանը սպառնացող վտանգները: Այդ հոդվածը, ըստ Բաքվի, սպառնում է հենց տարածքային ամբողջականությանը: