Էպոսագետը ժամանակին Րաֆֆի Հովհաննիսյանին համեմատել է էպոսի հերոսներից մեկի հետ

ՀՀ նախագահի թեկնածու Րաֆֆի Հովհաննիսյանը լրագրողների հետ հանդիպման ժամանակ, մեկնաբանելով Վարդան Սեդրակյանի երեկվա ակնարկը, թե ինքը բավարար հիմքեր ունի պնդելու, որ Հայրիկյանի դեմ կատարված մահափորձը կազմակերպվել եւ իրականացվել է Արեւմտյան Եվրոպայում եւ ԱՄՆ-ում բուռն գործունեություն ծավալած մասոնական կազմակերպության միջոցով, որի անդամն են նաև Րաֆֆի Հովհաննիսյանը և նրա հայրը, հայտարարեց, որ սուտ վկայության համար էպոսագետը պետք է պատասխան տա դատարանի առջև:

«Ես երբեք մասոնական կազմակերպության անդամ չեմ եղել և որևէ կապ չեմ ունեցել նման որևէ կառույցի հետ: Ես պատրաստ եմ պատասխանել դատախազության հարցերին»,- նշեց նա և անկեղծացավ, որ ժամանակին առնչություն ունեցել է էպոսագետի հետ:

«Սեդրակյանը եղել է իմ ամենամտերիմ գործընկերոջ` Անահիտ Բախշյանի աշակերտը: Նա է մեզ ծանոթացրել: Սեդրակյանն այդ ժամանակ էպոսի ինչ-որ հերոսի հետ էր փորձում ինձ համեմատել»,- նշեց Հովհաննիսյանը, բայց չցանկացավ ասել, թե կոնկրետ ո՞ր հերոսի: