Միջազգային նոր կինոփառատոն` Հայաստանում

Հայաստանում առաջին անգամ կանցկացվի «Հակամարտությունը եւ հաշտեցումը կենտրոնական-արեւելյան Եվրոպայի կինոշուկայում» միջազգային կինոփառատոնը:

Yerkir.am-ի հետ զրույցում ՄԱԿ-ի հանրային տեղեկատվական վարչության վարչական գծով օգնական Արմինե Անտոնյանը նշեց, որ կինոփառատոնը մրցութային չէ, իրականացվում է Հայաստանում ՄԱԿ-ի գրասենյակի եւ 7 դեսպանատների աջակցությամբ:

«Այսօր կլինի փառատոնի բացումը, եւ այսուհետեւ յուրաքանչյուր չորեքշաբթի կցուցադրվի մեկական ֆիլմ: Փառատոնը կշարունակվի մինչեւ ապրիլի 10-ը»,- ասաց Անտոնյանը:

Նա նշեց նաեւ, որ մասնակից երկրների ցանկն ընտրվել է` հաշվի առնելով այն հանգամանքը, թե որ պետություններն են 20-րդ դարում հակամարտություններ ունեցել, սակայն հետո արդեն գնացել են հաշտեցման:

«Ֆիլմերն առաջին անգամ են ցուցադրվում Հայաստանում: Հիմնականում գեղարվեստական ֆիլմեր են, որոնք մի շարք փառատոների են մասնակցել եւ մրցանակների արժանացել»,- ասաց Անտոնյանը` հավելելով, որ ֆիլմերը կցուցադրվեն «Մոսկվա» կինոթատրոնում, իսկ մուտքն ազատ է լինելու:

Ի դեպ, ֆիլմերը կցուցադրվեն իրենց բնօրինակ լեզվով, սակայն կլինեն նաեւ անգլերեն լուսագրեր: