Երեւանում հաստաբուն ծառն արմատախիլ է եղել եւ ընկել ԱԱԾ-ին պատկանող մեքենայի վրա

Այսօր` ժամը 19:30-ի սահմաններում, ՀՀ Արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ Գրիբոյեդովի փողոցի 1-ին Ա շենքի բակում հաստաբուն ծառն ընկել է ՎԱԶ 21-07 մակնիշի ավտոմեքենայի վրա:

Ֆոտոլրագրող Գագիկ Շամշյանի հաղորդմամբ` դեպքի վայր են ժամանել հրշեջ-փրկարարական ջոկատի աշխատակիցները, ովքեր պետք է ծառը հատուկ տեխնիկայի միջոցով ավտոմեքենայի վրայից տեղափոխեին: Նշում է, որ ծառն արմատախիլ է եղել ուժեղ քամու հետևանքով:

Ավտոմեքենայի համարանիշները հաշվառված են Ազգային անվտանգության ծառայության հաշվեկշռում: Բարեբախտաբար, այդ պահին ավտոմեքենայում ոչ ոք չի եղել: