Թուրքական իշխանությունների առաջին քայլը` հայերի վրա իրականացված հարձակումների դեմ

Ստամբուլի ոստիկանական բաժանմունքն անվտանգության տեսախցիկներ է տեղադրել քաղաքի հայաբնակ Սամաթիա թաղամասի տարբեր հատվածներում` հայերի անվտանգությունն ապահովելու համար:

Today's Zaman պարբերականի հաղորդմամբ` Ֆաթիհի քաղաքապետ Մուստաֆա Դեմիրն այցելել է Սամաթիայի Սուրբ Գեւորգ եկեղեցի, ինչպես նաեւ հանդիպել հարձակումների զոհ դարձած հայերին եւ վստահեցրել, թե ոստիկանությունը մանրամասն հետաքննությունն է անցկացնում հանցագործներին հայտնաբերելու համար:

Պարբերականը մեջբերում է Սուրբ Գեւորգ եկեղեցու հովիվ Տեր Եսայի քահանայի  խոսքերը, թե ոստիկանությունը կապ է պահպանում եկեղեցու հետ եւ հայտնում հետաքննության զարգացումների մասին: Այնուամենայնիվ, զարգացումներ դեռ չկան: Մինչ օրս որեւէ մեկը չի մեղադրվել հայ կանանց դեմ իրականացված 4 հարձակումների մեջ, որոնցից առաջինը տեղի էր ունեցել դեկտեմբերի 28-ին: