ՀՀ զինուժն ամեն օր խաղաղություն է ձեռք բերում

ՀՀ զինված ուժերն իր առջև դրված ծանրագույն խնդիրն իրականացնում են' ամեն օր ձեռք բերում խաղաղություն: Այս մասին լրագրողների հետ հանդիպման ժամանակ հայտարարեց ռազմական փորձագետ Դավիթ Ջամալյանը:

Նրա խոսքով` վերջին երկու տարիներին հստակ ուշադրություն է դարձվել վաշտի հրամանատարների գործունեությանը, ինչը և նպաստել է բանակում հանցագործությունների թվի նվազմանը:

Ըստ նրա` զինուժի կարևորագույն խնդիրներից է սերժանտային կազմի կայացումը, անհրաժեշտ է գրավիչ դարձնել զինվորականի աշխատանքը: Նա կարևորեց հատկապես մարտական հերթապահությունն ապահովող զինվորների անվտանգությունը:

«Նրանք ևս կարիք ունեն պաշտպանության: Մեր յուրաքանչյուր հենակետ վերածվել է մի փոքրիկ ամրոցի: Դրա շնորհիվ անցյալ տարի ոչնչացվել են տասնյակ դիվերսիոն խմբեր»,- տեղեկացրեց Ջամալյանը:

Անդրադառնալով աղջիկների զինվորական ծառայության անհրաժեշտությանը` նա ասաց, որ պետք է հնարավորություն ստեղծել, որպեսզի աղջիկները ևս կարողանան իրենց դրսևորել այդ ասպարեզում: Բայց չպետք է մոռանալ մեր ազգային մտածելակերպը` բնավ պարտադիր չէ` կանայք զորակոչվեն բանակ: