Երիտասարդները շարունակում են մնալ առանց զբաղմունքի

Սպորտի և երիտասարդության հարցերի փոխնախարար Արսեն Քարամյանը լրագրողների հետ հանդիպման ժամանակ խոսեց 2013-ին մարզերում երիտասարդության զբաղվածության խնդիրները լուծելու հեռանկարների մասին: Yerkir.am-ի թղթակիցը խնդրեց փոխնախարարին ամփոփել 2012 թվականը և նշել որևիցե մարզ, որտեղ զբաղվածության խնդրի լուծման որոշակի տեղաշարժ է նկատվում:

«Զբաղվածության մասով մենք տեղաշարժեր չունենք: Դուք գիտեք, որ 2008-2009թթ. մոլեգնած ֆինանսատնտեսական ճգնաժամը հարվածեց առաջին հերթին աշխատատեղերին: Կառավարությունից երկար ժամանակ պահանջվեց կայունությունը վերականգնելու համար»,- պատասխանեց  փոխնախարարը:

Yerkir.am-ի դիտարկմանը, թե ստացվում է, որ մինչև 2012-ը նախարարությունն այդ ուղղությամբ որևէ աշխատանք չի կատարել, Քարամյանը պատասխանեց հարցով. «Իսկ ի՞նչ էիք ակնկալում նախարարությունից»: Այնուհետև հստակեցրեց պատճառը. «Խնդիրը մեր նախարարության իրավասությունների մեջ չէր: Երիտասարդների խնդիրները բազմասեկտոր են, առնչվում են այլ նախարարությունների ևս: Մեկ գերատեսչության տիրույթում հնարավոր չէ բազում խնդիրներ լուծել»: