Եվրոպական բանկային միությունը ստեղծվում է

Եվրամիության գագաթաժողովը հավանություն է տվել Եվրոպական բանկային միության ստեղծմանը: Աայդ մասին այսօր հայտարարել է ԵՄ նախագահ Հերման վան Ռոմպույը. տեղեկացնում է ИТАР-ТАСС-ը:

«Բանկային միության ստեղծման առաջին քայլը կլինի մինչեւ 2014 թվականի գարուն ԵՄ միասնական վերահսկիչ մեխանիզմը գործի դնելը»,- ասել է նա` նշելով, որ այդ հարցով երեկ համաձայնության են եկել ԵՄ երկրների ֆինանսների նախարարները:

Ըստ Ռոմպույի` երկրորդ քայլը բանկերի վերակապիտալացման ուղիղ համակարգ ստեղծելն է, որը հնարավորությւն կտա խնդիրներ ունեցող բանկերի մասնակի կամ լրիվ սնանկություն դեպքում խուսափել «դոմինոյի էֆեկտից» ամբողջ եվրոպական ֆինանսական համակարգում:

Բանկային միության ստեղծումը Տնտեսական եւ մոնետար միության հետագա ամրապնդման կարեւորագույն փուլն է. այդպիսով` եվրոյի գոտու տնտեսական եւ ֆինանսական քաղաքականությունը պաշտպանվում է ինքնիշխան երկրների տվյալ գործառույթների թուլացումից: