Վարչապետը շնորհավորել է նախկին գործընկերոջը

Վարչապետ Տիգրան Սարգսյանը այսօր շնորհավորական ուղերձ է հղել Հունաստանի նորանշանակ վարչապետ Լուկաս Պապադեմոսին։ 

«Եվրոպայի և Հունաստանի պատմության համար այս կարևորագույն պահին Ձեր կողմից կառավարության ղեկավարումը ստանձնելը չափազանց կարևոր և պատասխանատու առաքելություն է, քանզի այսօր ողջ աշխարհի ուշադրության կենտրոնում Հունաստանում զարգացող իրադարձություններն են։

Պարոն վարչապետ, հիշում եմ մեր համատեղ աշխատանքը, երբ Դուք և ես նախագահում էինք մեր երկրների կենտրոնական բանկերը։

Դուք արդյունավետ եք իրականացրել Ձեր աշխատանքը Հունաստանի կենտրոնական բանկի նախագահի պաշտոնում և ծանրակշիռ ներդրում եք ունեցել Եվրոպական կենտրոնական բանկի ամրապնդման գործում։ Ես համոզված եմ, որ հաջողելու եք նաև հիմա»,- ասվում է ՀՀ վարչապետի ուղերձում:

Տիգրան Սարգսյանը Հունաստանի վարչապետին մաղթել է ուժ, եռանդ և հաջողություններ` բարեկամ Հունաստանի առջև ծառացած խնդիրներն օր առաջ հաղթահարելու համար։