Բակո Սահակյանը Բունդեսթագում քննարկել է Ղարաբաղյան հիմնահարցը

ԼՂՀ նախագահ Բակո Սահակյանն այսօր այցելել է Գերմանիայի Դաշնային Հանրապետության խորհրդարան (Բունդեսթագ), որտեղ հանդիպել է մի խումբ պատգամավորների ու փորձագետների հետ:

ԼՂՀ նախագահի աշխատակազմի տեղեկատվության գլխավոր վարչությունից տեղեկացնում են, որ հանդիպման ընթացքում քննարկվել են երկկողմ հարաբերություններին, ադրբեջանա-ղարաբաղյան հակամարտության կարգավորմանը եւ տարածաշրջանային զարգացումներին առնչվող հարցեր: Երկուստեք նշվել է ադրբեջանա-ղարաբաղյան հակամարտության խաղաղ կարգավորման անհրաժեշտությունը:

Հանդիպմանը ներկա են եղել Գերմանիայում ՀՀ արտակարգ եւ լիազոր դեսպան Արմեն Մարտիրոսյանը, ԼՂՀ նախագահի աշխատակազմի տեղեկատվության գլխավոր վարչության պետ Դավիթ Բաբայանը, Գերմանիայում ԼՂՀ մշտական ներկայացուցիչ Հարություն Գրիգորյանը: 

Երեկ աշխատանքային այցի շրջանակներում Բակո Սահակյանը հանդիպել է նաեւ Քյոլն քաղաքի հայկական կազմակերպությունների ու գործարար շրջանակների ներկայացուցիչների հետ, քննարկել ԼՂՀ-ում տարբեր ծրագրերի իրականացման հետ կապված հարցեր: Այնուհետեւ նա այցելել է Հայ Առաքելական եկեղեցու Գերմանիայի թեմի առաջնորդարան, որտեղ առանձնազրույց է ունեցել թեմի առաջնորդ Գարեգին արքեպիսկոպոս Պեքճեանի հետ, ապա հանդիպել Քյոլնի հայ համայնքի ներկայացուցիչների հետ: