Մեհմեդ Փերինչեկը փորձում է կեղծել պատմությունը

Թուրք պատմաբան Մեհմեդ Փերինչեկը փորձում է կեղծել պատմությունը. վերջինս ռուսերեն լեզվով գիրք է հրատարակել` «Հայկական հարցը ռուսական արխիվային փաստաթղթերում», որում էլ ներկայացվել է, թե կոտորածը եղել է փոխադարձ ու դրա պատճառը պատերազմը եւ իմպերիալիստական Ռուսաստանն են եղել։

ՀՀ պետական արխիվի տնօրեն Ամատունի Վիրաբյանը տեղեկացրեց, որ Փերինչեկի հավաստմամբ` ռուսական արխիվներում մոտ 200 փաստաթուղթ կա, որոնք էլ կարող են ապացույց լինել իր գրքում բերված փաստերի համար:

«Մենք պարզել ենք, որ Ռուսաստանի արխիվներում Ցեղասպանության մասին այդ քանակությամբ փաստաթղթեր չկան»,- ասաց Վիրաբյանը` հավելելով, որ Ցեղասպանությանն առնչվող փաստաթղթերը պահվում են Գերմանիայի, Անգլիայի արխիվներում։

Արխիվի տնօրենը նաեւ ասաց, որ գրքում փաստաթղթերի հիմնական մասը ներկայացված է կրճատումներով. «Իսկ փաստաթղթերի ամբողջական տեքստն իմանալու նպատակով դիմել եմ ՌԴ իմ գործընկերներին` խնդրանքով, որ ինձ դրանց ամբողջական տեքստը տրամադրեն»: