Սերժ Սարգսյանն արտահերթ նախագահական ընտրություններ է ցանկանում

Թե' Սերժ Սարգսյանը եւ թե' Լեւոն Տեր-Պետրոսյանը ընտրություններին նայում են նախագահականի աչքերով. «Երկիր»-ի թղթակցի հետ զրույցում նշեց «Նոր ժամանակներ» կուսակցության նախագահ Արամ Կարապետյանը:

Նա համոզված է, որ արդեն այսօր նախագահ Սարգսյանը «խորհրդարանական ընտրությունների ուսերի վրա ակտիվորեն պատրաստվում է նախագահական ընտրություններին, համակարգից ազատում է բոլոր այն մարդկանց, ովքեր կարող են նախագահի պոտենցիալ թեկնածու դառնալ, որպեսզի իշխանական թեկնածու միայն ինքը մնա»:

Խորհրդարանական ընտրությունների վիճակը որակելով «տաղտկալի»` Կարապետյանը նշեց, որ ամեն ինչ արվում է, որ երեք նախագահի եռանկյունուց դուրս ոչ մեկը չգործի:

«Կարծում եմ` Սերժ Սարգսյանը ցանկանում եւ մտածում է արտահերթ նախագահական ընտրությունների մասին, քանի որ սպասվում են ծանր սոցիալ-տնտեսական ժամանակներ, նոր ճգնաժամ, իսկ Ռուսաստանում նախագահ է դառնում Վլադիմիր Պուտինը»,- վստահեցրեց Կարապետյանը, բայցեւ հավելեց, որ դժվար թե նախագահը արտահերթ ընտրությունների ռիսկին գնա, քանի որ «կարելի է դա սկսել, բայց մնալ տակը»: