Սերժ Սարգսյանի այցը Վրաստան չեղյալ չի հայտարարվել

Վրաստանի արտգործնախարար Գրիգոլ Վաշաձեն հերքել է տեղեկատվությունը, թե Հայաստանի նախագահ Սերժ Սարգսյանը չեղյալ է հայտարարել իր այցը Վրաստան:

«Ինձ զարմացնում է, թե որտեղից են այդ տեղեկությունները: Ոչ մի նման բան չկա, ես այստեղ եմ, որ նախապատրաստեմ նախագահի այցը»,- «Ազատություն» ռադիոկայանի հետ զրույցում ասել է Վաշաձեն: Իսկ թե երբ է կատարվելու Սերժ Սարգսյանի այցը, նա ասել է, որ ժամկետների մասին լրացուցիչ կհայտարարվի:

Հոկտեմբերին Վրաստանի նախագահի մամուլի քարտուղար Մանանա Մանջղալաձեն ԶԼՄ-ներին հայտնել էր, թե Սերժ Սարգսյանը Թբիլիսի է այցելելու նոյեմբերի սկզբին, սակայն Հայաստանի արտգործնախարության խոսնակ Տիգրան Բալայանը հայտարարել էր, որ նոյեմբերի առաջին կեսին երկրի նախագահի որեւէ արտասահմանյան այց նախատեսված չէ։ Լուրեր սկսեցին շրջանառվել, թե Սերժ Սարգսյանը վիրավորվել է Միխեիլ Սահակաշվիլիի` Տավուշի մարզում տեղի ունեցած սողանքի հետեւանքների վերացման վերաբերյալ արտահայտություններից: