Այսօր քաղաքապետի պաշտոնում Կ. Կարապետյանի աշխատանքային վերջին օրն է

Ըստ քաղաքապետարանի մեր հավաստի աղբյուրների` Երեւանի քաղաքապետ Կարեն Կարապետյանի հրաժարականն արդեն ընդունված է եւ այսօր նրա աշխատանքային վերջին օրն է:

Նույն աղբյուրների փոխանցմամբ` գալիք երկուշաբթի օրվանից Երեւանի քաղաքապետի պարտականությունները կստանձնի փոխքաղաքապետ Տարոն Մարգարյանը:

Կարեն Կարապետյանն իր թիմակիցներին հորդորել է եւս մեկուկես ամիս աշխատել, որպեսզի քաղաքապետարանի աշխատանքները կաթվածահար չլինեն:

Ըստ որոշ աղբյուրների` հրաժարականը կապված է նրա անվան շուրջ հյուսված ինտրիգների հետ. իբր նախընտրական շրջանումն կրպակներն ապամոնտաժելով` քաղաքապետը միտումնավոր սրում է իրավիճակը: Բացի այդ, խոսվում է, որ նրան առաջարկվել է ղեկավարել ՀՀԿ-ի նախընտրական քաղաքային շտաբը, սակայն այս առաջարկը քաղաքապետը մերժել է` պատճառաբանելով, որ ինքը ոչ թե կուսակցական գործիչ է, այլ տեղական ինքնակառավարման մարմնի ղեկավար եւ իր լծակները կարող է օգտագործել միմիայն քաղաքի բարօրության, այլ ոչ թե` քաղաքական նպատակների համար: