Reuters-ը անդրադարձել է հայերի կոտորածին. Անկարան կատաղած է

Արեւմտահայաստանի Վանի նահանգի հոկտեմբերի 23-ի երկրաշարժը լուսաբանել է նաեւ հեղինակավոր Reuters գործակալությունը, սակայն պաշտոնական Անկարան գործակալությունից պահանջել է խմբագրել տարածած տեղեկությունը:

Տարաձայնությունը ծագել է այն պատճառով, որ հոդվածում ներկայացվել է նաեւ Վան քաղաքի պատմությունը, եւ Reuters-ը անդրադարձել է թուրքերի կողմից հայերի դեմ իրականացված կոտորածներին և բռնագաղթին. գրում է «Միլլիեթ»-ը: Թուրքական օրաթերթը փորձել է պարզել՝ ինչո՞ւ է Reuters գործակալությունը նման շեշտադրումներով ներկայացրել Թուրքիայում տեղի ունեցած երկրաշարժը:

«Միլլիեթը» եզրակացնում է, որ քուրդ բնակչության և հայերի ջարդերի վերաբերյալ տեղեկությունը ոչ այլ ինչ է, եթե ոչ թուրքերի հանդեպ բացահայտ թշնամանքի դրսևորում: «Կարծես այդ տեղեկությունը ոչ թե Reuters–ն է հաղորդել, այլ «Երևան» լրատվական գործակալությունը»,- գրում է «Միլլիյեթը»՝ ավելացնելով. «Սակայն Reuters-ը թուրքական կողմի հակազդեցության արդյունքում հանել է վերոնշյալ նախադասությունը և նյութը վերաթողարկվել է»: