Այս տարի Արցախն արդեն 10 հազար այցելու է ունեցել

Այսօր ԼՂՀ արտաքին գործերի նախարարության հյուպատոսական ծառայությունում գրանցվել է այս տարվա 10 հազարերորդ այցելուն` Ռուսաստանի Դաշնության քաղաքացի, բանաստեղծ եւ թարգմանիչ Վադիմ Ռախմանովը. տեղեկացնում է ԼՂՀ ԱԳՆ  լրատվական ծառայությունը: Նրան շնորհվել է հավաստագիր եւ հուշանվեր` Լեռնային Ղարաբաղի խորհրդանիշով:

2011թ. անցած 9 ամիսների ընթացքում ԼՂՀ այցելած օտարերկրացիների թիվը 64 տոկոսով գերազանցում է նախորդ տարվա նույն ժամանակահատվածի ցուցանիշը: Գերակշռում են ՌԴ, ԵՄ երկրների, ԱՄՆ, Իրանի, Կանադայի քաղաքացիները:

Շարունակում է ընդլայնվել նաեւ ԼՂՀ այցելողների աշխարհագրությունը. Լեռնային Ղարաբաղ են այցելում զբոսաշրջիկներ Ճապոնայից, Չինաստանից, Սինգապուրից, Բրազիլիայից, Վենեսուելայից, Իսրայելից, Նոր Զելանդիայից, Հնդկաստանից, Կոտ դ'Իվուարից եւ այլ երկրներից: Արցախի նկատմամբ հատուկ հետաքրքրություն են ցուցաբերում Սփյուռքի ներկայացուցիչները: