Կրպակների ապամոնտաժման հետ կառավարությունը կապ չունի

«Ժառանգություն» կուսակցության պատգամավոր Ստյոպա Սաֆարյանը կառավարության հետ հարցուպատասխանի ժամանակ անդրադարձավ Երեւանում ապամոնտաժող կրպակների խնդրին: Պատգամավորը նկատեց, որ թեեւ վարչապետը հայտարարել էր, թե ոչ մի գործող կրպակ չի ապամոնտաժվելու, սակայն իրականությունը այլ է:

Հարցին ի պատասխան`  փոխվարչապետ,  տարածքային կառավարման նախարար Արմեն Գևորգյանը հայտարարեց, որ վարչապետը նման ցուցում տված լինել չէր կարող, քանի որ Երեւանի քաղաքապետը կառավարությանը ենթակա մարմին չէ: «Եթե չեմ սխալվում, դա առաջարկություն է եղել, և նշվել է, որ անհատապես պետք է բոլորի հետ աշխատել, բոլոր խնդիրները քննարկել մեկ առ մեկ»,- հիշեցրեց Արմեն Գեւորգյանը։

Նա հայտարարեց, թե Երեւանի քաղաքապետարանն ամեն ինչ իրականացնում է սեփական լիազորությունների շրջանակներում, իսկ բոլոր այն քաղաքացիներին, որոնք համաձայն չեն այդ որոշումների հետ, խորհուրդ տվեց դիմել դատարան: