Սիրիան ՆԱՏՕ-ի հարձակմանը կպատասխանի Թել Ավիվի ոչնչացմամբ

Սիրիայի նախագահ Բաշար Ասադը հայտարարել է, որ հրդեհ կբռնկի Մերձավոր Արեւելքում, եթե արտաքին ուժերը փորձեն միջամտել երկրի գործերին. տեղեկացնում է իրանական Fars գործակալությունը:

Նախագահը Թուրքիայի արտգործնախարար Ահմեդ Դավութօղլուի հետ հանդիպման ժամանակ ասել է, որ եթե ՆԱՏՕ-ն հարձակում սկսի, ոչ մի բանի առջեւ կանգ չի առնի Իսրայելի գլխավոր բնակավայրերը հրթիռային հրետակոծման ենթարկելու համար: Նա բառացիորեն ասել է հետեւյալը. «Եթե խելագարները փորձեն սպառնալ Դամասկոսին, ինձնից կպահանջվի 6 ժամ Գոլանի բարձունքներում հրթիռներ տեղադրելու եւ Թել Ավիվը երկրի երեսից ջնջելու համար»: Ավելին` նա պահանջելու է, որ «Հըզբոլլահն» էլ Լիբանանից հրետակոծի իսրայելական տարածքները, իսկ Իրանը կխորտակի ամերիկյան նավատորմը Պարսից ծոցում:

Ի դեպ, Թուրքիայի ԱԳՆ ներկայացուցիչ Սելջուկ Ունալը հերքել է այդ տեղեկատվությունը` նշելով, որ Դավութօղլուն վերջին շրջանում ընդհանրապես չի հանդիպել Ասադի հետ, իսկ նախորդ հանդիպումների ժամանակ Սիրիայի նախագահը նման հայտարարություն չի արել: