Դոկտոր Մահի կտավները աճուրդի կհանվեն

Բժիշկ Մահ անունով հայտնի` հայկական ծագումով ամերիկացի բժիշկ Ջեք Գեւորգյանի կտավները, ձեռագիր գրառումներն ու անձնական որոշ իրեր հոկտեմբերի վերջին Նյու Յորքում աճուրդի են հանվելու: Associated Press-ը գրում է, որ աճուրդից ստացված հասույթի հիմնական մասը փոխանցվելու է նրա միակ ժառանգին` զարմուհուն, մի մասն էլ հատկացվելու է քաղցկեղի դեմ պայքարող բարեգործական մի կազմակերպության։

Բժիշկ Ջեքի կտավների մեծ մասը մահվան թեմաներով են: Ուշագրավներից է «Ցեղասպանություն» նկարը, որում պատկերված թուրք եւ գերմանացի զինվորներ երկու կողմից մի արյունոտ գլուխ են բռնել: Կտավում, ամենայն հավանականությամբ, արտացոլված է հայերի եւ հրեաների ցեղասպանությունը:

Հիշեցնենք, որ բժիշկ Մահը էվթանազիայի էր ենթարկել 130 ծանր հիվանդի: Իսկ 1998 թվականին սպանության մեղադրանքով դատապարտվել էր 25 տարվա ազատազրկման, սակայն առողջական խնդիրների պատճառով ազատ էր արձակվել 8.5 տարի անց: Մահացել է 83 տարեկան հասակում: