Չի բացառում ոչինչ

Մոսկվայում համառուսաստանյան «Եդինայա Ռոսիա» կուսակցության համագումարին հրավիրյալ կարգավիճակով մասնակցել են ՀՀԿ-ական պատգամավորներ Գագիկ Մելիքյանը և Գագիկ Մինասյանը:

«Մեր պատվիրակությունը հանդիպեց Բորիս Գրիզլովի հետ, եւ մենք նրան փոխանցեցինք Սերժ Սարգսյանի ուղերձը»,- այսօր լրագրողների հետ հանդիպման ժամանակ ասաց Գագիկ Մելիքյանը` հավելելով, որ ՀՀ նախագահի ուղերձն այնտեղ ջերմորեն ընդունվեց:

Ըստ նրա` առանձնազրույցի ընթացքում Գրիզլովը հպարտությամբ է խոսել իր և Սերժ Սարգսյանի անձնական հարաբերությունների, մասին, անդրադարձել է երկու երկրների առաջիկա խորհրդարանական ընտրություններին եւ ասել, որ Ռուսաստանում «Եդինայա Ռոսիա»-ի, իսկ Հայաստանում Հանրապետական կուսակցության հաղթանակները շատ մեծ նշանակություն ունեն իրենց համար:

Գագիկ Մելիքյանը նշեց, որ զրույցի ժամանակ քննարկվել է նաեւ Ղարաբաղյան հիմնահարցը ու դրա լուծման խաղաղ տարբերակը:

Անդրադառնալով առաջիկա նախագահական ընտրություններին` ՀՀԿ-ական պատգամավորը լրագրողներին ասաց, որ Հանրապետական կուսակցությունը դրանց  պատրաստվում է գնալ իր թեկնածուով` Սերժ Սարգսյանով. «Դա մեզ համար շատ կարևոր է, քանի որ այդ հանգամանքը տեղ է գտել կոալիցիոն հուշագրում»:

Պատասխանելով լրագրողներից մեկի հարցին, թե ի՞նչ է կարծում Ռոբերտ Քոչարյանի վերադարձի մասին, պատգամավորը չբացառեց դա` նշելով. «Ես բոլորի մասնակցությունն ապագա նախագահական ընտրություններում անհնարին չեմ համարում: Համարում եմ հնարավոր»: