Նիցցայում կբացվի Ռուբեն Սեւակի հուշակոթողը

Երևանի քաղաքապետ Կարեն Կարապետյանի գլխավորած պատվիրակությունը, Նիցցայի քաղաքապետ Քրիստիան Էստրոզիի հրավերով, սեպտեմբերի 23-25-ը պաշտոնական այցով գտնվելու է Ֆրանսիայի Նիցցա քաղաքում՝ Հայաստանի անկախության 20-ամյակի առթիվ կազմակերպվող ընդունելությանը, ինչպես նաև 1915 թվականի Հայոց ցեղասպանության զոհերի հիշատակին նվիրված` Ռուբեն Սևակի հուշակոթողի բացման արարողությանը մասնակցելու նպատակով:

Հիշեցնենք, որ Երևանը և Նիցցան 2007թ. սեպտեմբերից քույր քաղաքներ են: Ինչպես տեղեկացնում են քաղաքապետարանից, այցի ընթացքում նախատեսվում է հանդիպում Նիցցայի քաղաքապետի հետ, որի ընթացքում կքննարկվեն երկկողմ համագործակցությանն առնչվող հարցեր: Նախատեսվում են նաև քաղաքապետ Կարեն Կարապետյանի մի շարք հանդիպումներ ֆրանսահայ համայնքի ներկայացուցիչների հետ: